आधार...

सायंकाळीच घाई असते,

अंतहीन त्या रात्रीची,

सुखे आधीच झोपलेली,

आता नजर ही मुक्तिची,

खोटा भाव हा सगळा ,

वेगळा तो न समजला कधी,

खऱ्या मरणाआधी मिळाली ,

ही सक्तीची जिवंत समाधी ,

तरीही असमाधानी मन ,

प्रवास हा निरंतर,

सफरीचे वेध हे दूरचे ,

वाट न संपे भर भर,

तरीही चालायचे असते ,

खोटया प्रेमाखातर नेहमी ,

आपल्याच दारात उभे राहायचे,

त्या अर्धनग्न भिक्षुकापरी,

आम्ही ज्यांना उभे केले ,

त्यांनीच केले निराधार ,

रक्तच आज दूर लोटते,

मागू तरी कुठे आधार ?,

खंबीर मनाकडे माझ्या,

आहे शरीर हेलकावणारे,

उडायचा विचार फार केला,

पंखच माझे थरथरणारे ,

नशिबी नसावा मुलांच्या माझ्या ,

असह्य हा प्रवास लाचारीचा,

माफ कर देवा त्याला ,

शेवट कर माझ्या यातनांचा ,

शेवट कर माझ्या यातनांचा ..........