Protected by Copyscape Online Plagiarism Software

Friday, January 28, 2011

एक थेंब

एक थेंब डोळ्यातला
आज पावसाआड लपला 
रडायचे होते त्याला 
तरी खोट खोट हसला  

हृदयात कोणी नाही
म्हणून कंटाळून गेला
नवी जागा शोधताना    
डोळ्यात थांबला मेला !

डोळ्यांनाही जड झाला
तोच बाहेर पडला
स्वातंत्र्याच्या नवलाईने
थोडासा अवघडला 

दु:खात  रोजच भिजणारा   
आज पावसात भिजला
रडत  रात्री जागवणारा   
हसत  निवांत  निजला  

-       निमिष  

Wednesday, January 19, 2011

तुझ्यासाठी...


चांदणी होशील तू जेव्हा,
मी तेव्हा चंद्र होईन,
चमकत असशील आकाशात तू,
मी तुलाच बघत राहीन,

हवे असेल प्रेम जेव्हा तुला,
मी तुझा प्रियकर होईन,
प्रियसी असशील तू माझी,
तुझ्यावर प्रेम करत राहीन,

इंद्रधनू  असशील तू जेव्हा,
मी आभाळ बनून राहीन,
अस्पष्ट होत जाशील तू ,
मी क्षितीज बनून राहीन,

नदीसारखी वाहशील तू,
मी किनारा बनून राहीन,
आकाश पांघरशील मेघ बनून तू,
मी पाऊस बनून राहीन,

दुख्ख होईल तुला ज्यावेळी,
मी अश्रू बनून बरसेन,
तू खुष असशील तेव्हा,
तुझ्यासाठी दुखातही हसेन,

फुलपाखरासारखी फिरशील तू ,
मी फुल बनून राहीन,
स्पर्श झाला तुझा तर,
आयुष्यभर मी कोमेजणार नाही,

वाटले तुला जर फुल व्हावेसे,
मी तुझा गंध बनून राहीन,
कितीही वेळ झाला तरी,
तुझ्या सहवासात हरवून जाईन,

त्रास होईल तुला जेव्हा,
मी दूर दूर जाईन,
मेल्यानंतर सुद्धा सखे ,
थडग्यावर तुझी वाट बघत राहीन,
...वाट बघत राहीन...  
  

Tuesday, January 18, 2011

प्रणय...


शांतता असावी प्रणयातली,
स्मशानातली नकोच कधी,
दोघांनीही जाणूनबुजून जपलेली,
बंद डोळ्यात कुजबुजलेली,

आवेग असावा सुखाचा,
नको तो अश्रू यातनांचा,
विचार असावा एकमताचा,
मदमस्त त्या पवित्र रात्रीचा,

काळोखात मिठी घट्ट व्हावी,
श्वासांची हितगुज रंगावी,
बंद डोळ्यातही गाली हसावे,
प्रेम शहाऱ्यात हरवून जावे,

हवी असलेली तळमळ वेडी,
स्पंदनात ती घाई सुखाची,
जिव वेडा क्षणही तसेच,
उन्हात भासे हुरहूर पावसाची,

ओठांचा संवाद तृप्तीचा,
लाज नाचते अंगावरती,
स्पर्श सगळे बोलके बोलके,
दोघांच्याही मिठीत विरघळती,

असती क्षण जवळचे जरी,
कातरवेळी घाई मनी,
सांज जवळ येता येता,
चाहूल प्रणयाची नशील्या तनी,

सुखावते अंगांग सारे,
बेधुंदीचे शांत वारे,
गडबड श्वासांची असे चंचल,
भावनांचा मनी रोजच गोंधळ ,

विखुरलेली ती सावरते स्वतःला,
विरघळलेली सुखं मनात जपायला,

  इशारे त्यांचे दिवसा हेच सांगती,  
रात्र लवकर झोपतच नव्हती,

Monday, January 17, 2011

लाट...


उमळती आठवणी अशा,
नद्याही न पुरती मला,
पाऊसही वेडा जाहला ना,
थेंबानाही वाटे व्हावेसे झरा,

इंद्र धनु उमटले आभाळी,
मेघांचाही नाच रंगला,
क्षणिक होती नववधू ती,
थरथरली भाबडी समृद्ध धरा,

सगळं सगळं सगळं आहे,
सगळचं आहे कसं म्हणू ?,
सगळं म्हणजे तीन शब्द,
फक्त “च” साठी मी किती झुरू?,

यश ,पैसा ,समृद्धी,
भरभरून आहे,
हे सगळे असून सुद्धा,
डोळ्यात किस्पट तरुण आहे,

रोमांचिले तन माझे ,
मन जाहले वेडे पिसे ,
म्हणू कारे ? मी रोम याला,
आलेत आठवणींचे नकोसे ठसे,

आनंदाने सोडले नाही कधी,
नाही विसरले मन हसायला,
गालावर असते खळी अजूनही,
घाबरते सुखच इथे रुजायला,

प्रेम,मैत्री,नाती,
समजत नाही असे नाही,
पाऊलवाट रोजचीच असते,
पण ओळखीचीच वाटत नाही,

गाणी ,कविता,भटकंती,
मस्त विरंगुळा आहेच,
मनाचं काय सांगू कुणाला?,
आठवणींनाच जे धरून आहे,

विचार करून निष्कर्ष कसला,
पापण्याआड आठवण उभीच असते,
डोळे उघड नाहीतर बंद कर,
लाटेत आठवणीच्या मन हसुनही रुसते,
         आणि कधी कधी रुसुनही हसते,         

Friday, January 14, 2011

एक सुंदर घर असावं...



मला वाटतं आकाशात,
सुंदर एखादं घर असावं,
सोन्या चांदीची इच्छा नाही ,
चंद्र ताऱ्यांच कुंपण असावं,

वेली असाव्यात तिथे देखील,
फुलांच्या मनी प्रेम असावं,
मला वाटतं आकाशात,
सुंदर एखादं घर असावं,

रोज रोज पाऊस तिथे पडावा,
मीही रोज त्यात भिजावं,
थंडुन जेव्हा घरी यावं,
तेव्हा सुर्याने मला मिठीत घ्यावं,
चंद्राने रोज गोष्टी सांगाव्यात,
चांदण्यांनी स्वतःचं स्वप्नात यावं,
मला वाटतं आकाशात,
सुंदर एखादं घर असावं,

पावसाने आपलं कारंज करावं,
सागराने स्वतःचं तळ करावं,
वेडीवाकडी वळणे घेन सुद्धा,
नदीने इथेच खेळायला यावं,
झाडं असावीत तिथेदेखील,
मुळांना रागाचं वंगण नसावं,
बहरताना झाड एखादं ,
स्वर्गाने त्यात मनापासून फुलावं,
मला वाटतं आकशात,
असं एखादं घर असावं,   

Thursday, January 13, 2011

आधार...


सायंकाळीच घाई असते,
अंतहीन त्या रात्रीची,
सुखे आधीच झोपलेली,
आता नजर ही मुक्तिची,

खोटा भाव हा सगळा ,
वेगळा तो न समजला कधी,
खऱ्या मरणाआधी मिळाली ,
ही सक्तीची जिवंत समाधी ,

तरीही असमाधानी मन ,
प्रवास हा निरंतर,
सफरीचे वेध हे दूरचे ,
वाट न संपे भर भर,

तरीही चालायचे असते ,
खोटया प्रेमाखातर नेहमी ,
आपल्याच दारात उभे राहायचे,
त्या अर्धनग्न भिक्षुकापरी,

आम्ही ज्यांना उभे केले ,
त्यांनीच केले निराधार ,
रक्तच आज दूर लोटते,
मागू तरी कुठे आधार ?,

खंबीर मनाकडे माझ्या,
आहे शरीर हेलकावणारे,
उडायचा विचार फार केला,
पंखच माझे थरथरणारे ,

नशिबी नसावा मुलांच्या माझ्या ,
असह्य हा प्रवास लाचारीचा,
माफ कर देवा त्याला ,
शेवट कर माझ्या यातनांचा ,
शेवट कर माझ्या यातनांचा ..........