Protected by Copyscape Online Plagiarism Software

Saturday, October 30, 2010

माजो चिखल ,,,,

या चिखलाच्या पेरणीत,कसो मिया लडबडीत,
जसा माझा जीवन सुध्धा,या तरयाच्या येका ओळीत,
कितके हे प्रयत्न,जसा जळता माझा काळीज,
जन्मभर कष्ट करून सुध्धा,मिया दुख्खांच्या ओंजळीत,

भित्रो नाय आसय मिया ,मरणाची भीती नाय माका,
झिला चेडवाचो भयं दिसता,बायलेचा काळीज माझ्यात धडाकता,
माझ्या काळजाक मिया कधीच चीरडलय,
जसो काळजाचो माझ्या चवाटो केलय,
पण माझ्या पोरांचा काय? इचार करताना,
रोज रोज मिया वायचसो मेलय,

पावसात तरयो लायताना ,दुख्खाचो बान फोडतय मिया,
माझ्याच प्रत्येक थेम्बांका ,चिखलात हरावताना बघतय मिया,
दोन रुपयाची नोट आजुनसुध्धा माझ्याकडे गावात,
गावलेली आटणी पोराची जाता त्याच्या बुडकुल्यात रवाक ,
आजयेच्या घोटयेत दोन फुटके सुपारे गावतीत,
बायलेच्या पदरात गरीबाची लंका गावात,

अर्दो कप कोरी चाय,धड ती भाकरी सुध्धा भिजना नाय,
खोटा सुख बघून बायले पोराचा ,काळीज फाटल्याशिवाय रवना नाय ,
चेडू माझा कोंकणातला .आवशीचा काळीज कोंकण ,
हाडा झीजयलेन म्हातारेन हिसर,माझ्या तर तनामनात ता पण,

शरीर आसा निरोगी माजा,रोज काम करून करून,
आयुष्याच्या पदाराक गाठी किती, ठिगळाका गुटाळून गुटाळून ,
माका फक्त वाव होयो,सहानभूती नको कोणाची,
पिसात माझ्या बळ आसा,कमी आसा फक्त मोकळ्या आकाशाची

Friday, October 29, 2010

चेडवाचो समुद्र

 
किनाऱ्यार बसल्यार तो, खुळ्यासारखो करता ,
अगो चेडवा समुद्र तुझ्यामाझ्यात रोजचोच उसाळता,
रेतयेत तिया पाय ठेयतय,ठशाक मात्र तिया थीसरच इसारतय,
अगो तिया गेल्यार मात्र, येड्या सारखो करता,
अगो चेडवा समुद्र तुझ्यामाझ्यात रोजचोच उसाळता.

बघू नको तिया त्याका,लामसून रूपाक भियान,
सांगाचा त्याका ह्याच होता, आयुष्याक जवळकर त्याच्यासारक्या धीरान,
अगो तुझ्या बद्दल इचारून,माकासुद्धा याड लायता,
अगो चेडवा समुद्र तुझ्यामाझ्यात रोजचोच उसाळता.

सांचेच्या येळात कसो,तुझ्या मनाक भुरळ घालता,
आटयतय तिया आयुष्याक,तो मात्र पायाक छेडून जाता,
असो वागता तुझ्या वंगडा ,आणि तुझ्याच डोळ्यात जावन रवता,
अगो चेडवा समुद्र तुझ्यामाझ्यात रोजचोच उसाळता.

पानयात खेळणाऱ्या पोरांका बघून,तुका सुद्धा पोरांची आठवण येत मा,
खोटा माका सांगा नको तिया ,सांग नवऱ्याचा प्रेम सुद्धा तुका आठवता मा ,
अगो असा बघू नको तिया, डोळ्यामागे तुझ्या तो येडो पिसो जाता ,
अगो चेडवा समुद्र तुझ्यामाझ्यात रोजचोच उसाळता.

प्रत्येक लाटेत अगो तो,तरंगाका तुझ्या छेडता ,
पायाखालच्या रेतयेक सरकवून,आपल्याकडे वडता,
इतक्या त्याच्या जवळ जातंय, तुका जरा तरी कळता ,
मिठीत घेवक बघता तुका तो , परतल्यार तिया तो भसा भसा रडता,
किनाऱ्यार बसल्यार तो खुळ्यासारखो करता ,
अगो चेडवा समुद्र तुझ्यामाझ्यात रोजचोच उसाळता

Thursday, October 28, 2010

नजरकैद (भाग-२)

पाहता तुझ्या डोळ्यांत
भान माझे हरपले
सांगायचे होते काही
शब्द सारे हरवले

मनाचे मनाशीच
नाते अतूट जाहले
डोळ्यांतून पाहताना
हृदयाशी जडलेले

सुखे माझी तुझ्या
डोळ्यांत विसावली
दुःखे तुझी माझ्या
अश्रूंतून पाझरली

स्वप्न सारे माझे
तुझ्यासवे रंगले
एकाच क्षणामध्ये
परिपूर्ण जाहले  
                          -          संकेत  गुजर      

Tuesday, October 26, 2010

हाक...


काहीतरी आज फार आठवले ,
पापण्याआड डोळ्यांनी मन लपवले ,
कळले नाही ते कसे ओघळले ,
होते माझे डोळे खरंच झाकलेले ,

थेंबांची आज रांग लागली ,
बंधारे नेत्रांचे रेटून वाहिली ,
मनाला बुडवूनी त्यात   ,
स्मृती मध्येच साठूनी गेली   ,

आठवण सुद्धा आज मला  ,
जुनी गोष्ट सांगू लागली ,
ती ही आज इथे रडली ,
मला सुद्धा रडवूनी गेली ,

म्हणे मला मी आठवण रे ,
माझ्यावर तू प्रेम करू नको ,
उगाच जळून जाशील रे,
दहनाचा हट्ट धरू नको,

हस तू फुलासारखा,
त्या शेंबड्या मुलासारखा ,
फुटक्या नशिबात जगलेल्या,
कावळ्याच्या पिलासारखा ,

डोळ्यातलं पाणी तुझ्या,
मनाला टोचत असेल ना ,
उगाच भावनांना तुझ्या ,
काट्यासारखं बोचत असेल ना ,

नको रडूस तू कधी ,
मी परत येणार नाही,
गालावरच्या फुलांना तुझ्या ,
वाईट काही बोलणार नाही ,

अरे तुझे आयुष्य आहे ,
बेभान उडणाऱ्या पक्षाचं,
पंखामध्ये कधीच आता,
घर नसेल तुटक्या मनाचं ,

आज तू उडून जा,
तुला पाहीजे तिथे ,
आठवणी सोडून जा ,
माझ्या घराच्या इथे ,

मी त्यांची काळजी घेईन,
तुला त्या नाही दुखावणार ,
तू हसशील परत तेव्हा ,
नेहमीसारखं नाही रडवणार,

नवे आभाळ घे अंगावर ,
धरिणीवर तू झोपी जा ,
एक स्वप्न तुटेल तेव्हा  ,
दुसरे तू स्वप्न  पहा............
 

Monday, October 25, 2010

ती सुद्धा जगतेय (भाग २)

लगेच धुंद गेली ,मी आरश्यासमोर आली ,
न्याहाळताना स्वतःला,चेहऱ्यावरची नजर मानेखाली गेली,

बघून जरा भीतीच वाटली,सणासुणाशिवाय कोणी तीथे ,
सिगरेटच्या टिपक्यांची ,दातांच्या पंक्तीची रांगोळी उमटवलेली,

म्हणतात मी ओरडत नाही,त्याची भूक भागवताना ,
हे मला चिमटे काढतात,श्वास माझे गुदमरताना,  

बेअब्रू माझे कामुख शरीर ,झाकायचा प्रयत्न कापडांचा,
रांगोळ्या रोज ठणकायच्या,झाकायचे काय ?हाच मोठा प्रश्न,

धार पाण्याची शरीर धुवायची,लुटलेली इब्रत कापडं झाकायची,
होळी सारखी रात्रभर जळलेली मी ,निखारे मनाचे गिळत राहायची,

कोकरू होतं महिन्याचं,दुधासाठी जे रडायचं,
स्तनाजवळ तोंड लावून सुद्धा,बिचारं आकांताने तडफडायचं,

स्तनांत दुध कधी नसायचं,रात्रीचं जे वंगण बनायचं,
तान्हुला माझा मुकायाचा त्यालाच ,जे फक्त त्याचचं होतं,

भाकरीचे पीठ मळावं,स्तनांचंही काहीसं तसंच झालं,
माई फेसच का ग येतो,कोकरू विचारायचं अन् काळीज तुटायचं,

दुध माझ्या तान्हयाचं,कोणी दुसरंच चाटून जायचं ,
वासनेच्या त्या क्षणांत ,आईपण माझं वाहायचं,

वासराचं हंबरणं ऐकून,गाईचं काय होत असेल,
दुध काढून पिणाऱ्यांना काय माहित ?,भाव तो मातृत्वाचा ,

अंगावर नजर फिरवायची ,मनाचे धाडस झालेच नाही,
जखमांच्या गर्दीत कधी ,सुरक्षित तो भाग दिसलाच नाही,

नाही नशिबी संसार अन्,नाही ते त्याचे रमणे,
तुटलेली तार विणेची अन्, फाटलेल्या तबल्याचे भंगणे ,

वाटले आत्महत्या करावी ,पण कुणासाठी ?,शरम वाटते म्हणून करू का ?,
कोणाची या बेशरम्यांची!!,कि आणखी कोणाची,असे प्रश्न !!

असाच मी अंधार ,चंद्रालाही नको असलेला ,
चांदण्याना काय माहित,नशीब सुर्याचं काय ते ?,

प्रेमाची फुललेली रात्र,स्वर्गातले सुख म्हणे,
माझ्या पदरात रोज येते,मग दैव माझे  असे कसे ?,

दिवसा मी माझ्यात नसते ,रात्री या जगात नसते ,
बेशुद्धीत मासकं सतवतात ,अन् शुद्धीत माणसं रगडतात,

मोठं होवून माझं पिल्लू ,काय करेल हा प्रश्नच आहे,
बाजारात बसेल स्वताः,नाहीतर मलाच बसवेल यात शंका नाही ,

असंच चालत चालत, चालत राहायचं ,
आयुष्य संपेपर्यंत ,चितेची आग तरी स्वताची असेल ही आशा  ............
आणि ते भस्म सुद्धा थोडं तरी पवित्र असेल .........मी नसेन जिवंत म्हणून तरी कदाचित !!!!!!!




Monday, October 18, 2010

आज उमगलं......


डोळे झाकताना,
विचार आला,
नात्यांचा ,
घाबरलोच  मी ,
विचारांनी गर्दी केली ,
यावे जावे एकटेच,
मग बंध कसले ?,
फक्त बांधायचे .
गळ्याला घट्ट .
गुदमरण्यापर्यंत ,
उरले ते घाव ,
ओले !! नेहमी ओलेच  ,
तरीही दुःख नव्हते ,
का कुणाचं ठावूक?,
मनाला विचारले,
वेडे लगेच लाजले,
नात्यांचा भाग तो,
असे म्हणून हसले  ,
शक्यच नाही,
कोणते हे नाते ?,
अलगद अश्रू झेलणारे ,
घावांना प्रेमाने भरणारे,
आठवलं!!!!!!,
तेच असेल कदाचित ,
गालावर दोन फुलं,
उतावळ्या ओठांचा मोह ,
डोळ्यातली नशा,
मिठीतलं सुख ,
स्वर्गाचं पावित्र्य,
आता कळले ,
हो हेच ते नाते,
एकमेकांशी जोडलेले.
तिने माझ्याशी ,
मी तिच्याशी,
खरंच !! हेच ते,
नाते सुखाचे,
तुझे आणि माझे  
“नाते तुझे माझे”    

Tuesday, October 12, 2010

नजरकैद...(भाग - १)


पाहताक्षणी तुजला
तुजवरी मी भाळलो
पाहून रूप साजिरे
अंतरीच रमलो  

सरसाविता तुजकडे
तू नजरेआड गेलीस
ध्यानीमनी तूच होतीस
अन् स्वप्नातदेखील आलीस

शोधण्या तुला नजर
चहुकडे फिरते
दिसता क्षणी तू
तुझ्यावरी स्थिरावते

तृप्त होईल कधी
माझे हे चातक मन
वर्षेल कधी मजवरती
तुझिया प्रेमाचे घन

पुन्हा पुन्हा भेटण्याची
आस मज लागली
चोरून मजकडे बघण्याची
अदा मनी भावली

तुझसाठी भ्रमर बनुनी
प्रेमऋतू मी देखिला
प्रेमकमलातील मकरंदाचा
स्वाद जणू चाखिला
-          संकेत गुजर